Դատավորներն արտահերթ ժողով են գումարում Աջափնյակի դատարանում

172

Երևան քաղաքի առաջին ատյանի ընդհանուր իրավասության դատարանի Աջափնյակ նստավայրում այսօր՝ մայիսի 27–ին դատավորները արտահերթ ժողով են գումարում:

NEWS.am-ի թղթակիցը հայտնում է, որ այս պահին արդեն 50-ից ավելի դատավորներ են ժամանել տարբեր դատարաններից, այդ թվում վերջին օրերին հանրության ուշադրության կենտրոնում հայտնված դատավորներ Դավիթ Բալայանն ու Մխիթար Պապոյանը: Այս պահին ժողովի ընթացքում պետք է որոշեն իրավազորության հարցը, որից հետո կորոշեն նաեւ ժողովի դռնփակ լինել-չլինելու հարցը:

Նշենք, որ արտահերթ նիստը հրավիրվել է ՀՀ Վճռաբեկ դատարանի նախագահ Երվանդ Խունդկարյանի հրամանով։

Նախնական տեղեկություններով՝ նիստի ընթացքում դատավորները կքննարկեն վարչապետ Նիկոլ Փաշինյանի կոչով մայիսի 20–ին Հանրապետության դատարանների մուտքերն եւ ելքերը արգելափակելու գործողություններն ու դրան հաջորդած վարչապետի հայտնի ելույթը։

Նշենք, որ Հայաստանում ներկայումս կա գործող 244 դատավոր։

Ընդհանուր ժողովն իրավազոր է, եթե դրան մասնակցում է դատավորների ընդհանուր թվի կեսից ավելին:

Հիշեցնենք, որ մայիսի 20–ի առավոտից Նիկոլ Փաշինյանի հրահանգով քաղաքացիները արգելափակել էին Հանրապետության բոլոր դատարանների մուտքերը եւ ելքերը։

Կեսօրին վարչապետը կառավարությունում խորհրդակցություն անցկացրեց դատական համակարգում տիրող իրավիճակի կապակցությամբ եւ ասաց, որ եկել է «վիրահատական միջամտություններ» իրականացնելու ժամանակը։ Այս գործողություններին հաջորդեցին քաղաքական գործիչների, իրավապաշտպանների եւ տարբեր  միջազգային տարբեր կառույցների հայտարարությունները, որոնք դատապարտում էին դատական համակարգին միջամտելու գործադիրի քայլերը՝ կոչ անելով ՀՀ իշխանություններին վերադառնալ իրավական դաշտ։